中國人壽節節上升

[willy]

今日中國人壽高見七元五分, 收市回落至六元四角...比招股價三元六角有七十八巴先升幅...相信有入票人仕可以過肥年....

若問現時是否股價很高? 係...真係好高....不過應該重有得升....點解? 好簡單, 股票市場係唔可以用常理分析, 如果唔係果d所謂專業股市評論員就個個發晒而唔需要出來口up up. (註: 本人都係口upup, 不過唔係一個專業股市評論員, 極其量只係一個失業既講股仔)

以下係本人對香港股市來年既預測: 以恆生指數於本年尾一萬二千五百點起計, 將會超越上次高位一萬八千六百點至二萬點. 點解? 好似一隻股票價值升跌, 主要受公司管理層質素及所屬行業前景所影響. 香港為南中國樞紐, 又正值華南經濟起飛, 盡佔地利天時. 至於政府管治方面, 特首董建華先生總結六年多的施政經驗, 本著 '想市民所想, 急市民所急', 既新施政理念, 香港政經何愁沒有一翻新氣象. (請注意, 董先生的家族公司東方海外已由一年內低位三元八角勁升至近期的二十四元多).

基於以上預測, 大家可以放心投資. 一於四兩博千金, 縱橫股壇. 請記著, "Cash is King" 的時代已靜悄悄地過去, 請把握賺取合理回報的機會.

講股仔留言

[beaniebean]

今日午飯時無聊得濟, 走咗去Yahoo既股票討論區八吓。有個網友話#2628升得好勁。由於我對股票呢家嘢係門外漢, 咪查吓係乜東東。真係大鄉里出省, 原來呢隻股就係中國人壽, 亦即係Willy幾年前係到post咗3個msg既股票。

原來呢隻股係1年前既價位約$6.7, 半年前已升到約$11, 而今日既收市價已去到$22.7。相信唔少人已開心到今晚去咗刷餐勁。睇嚟Willy應該係呢隻股既fans。如果係既話, 咁就congratulations!!!

股票呢家嘢既升跌只能用 “世事無常”嚟形容。早係幾年前, 我在被動情況下入咗某隻股票, 結果係唔理佢既情況下, 宜家收到既股息已超過50%回本。呢隻股最高位既時候係我買入價既5.5倍, 但後尾跌番去3.3倍, 跟住有1至2年就一直停濟不前。我本來都諗住呢隻股起碼要陪伴我至少2至3年先會升番去高位。點知近排一個有利消息, 令呢隻股升番去5.36倍, 宜家等緊大股東做決定, 到時我又會係被動既情況下同呢隻股講拜拜。佢陪咗我好幾個年頭, 真係有啲唔捨得! 當時同我一樣係被動情況吓買咗呢隻股既唔少人, 一早係升咗1倍既時候已經賣咗。我都算傻人有傻福。

哈哈, 講都無人會信, 我係未沽過股票出去。其中一個原因係個銀行既電話密碼唔知去咗邊, 另一個原因係我為人一向不變應萬變(其實係慢吞吞同心大心細)。不過, 一切都係“被動”, 呢個密碼暫時對我嚟講都係無用。

不過, 我都唔可以再做大鄉里, 但又好孤寒唔想交學費, 費事一生人要打幾世工。唯一可以做既嘢, 就係去吓Yahoo既股票討論區聽吓人哋講嘢, 學吓嘢先囉。不過, 討論區有個SUPERSTAR 叫做Joker, 好鬼多fans, 佢哋對偶像既擁戴同狂熱程度拍得住啲歌迷。呢個情況好有趣, 真係估唔到一個見唔既人係會咁受歡迎!

[willy]

有實力的股票是不怕長期持有, 淨收股息你已可以回本. 還記得早幾年有個阿伯死左, 佢平時家景清貧, 但開佢個保險箱時發覺佢有過億匯豐股票 (可能佢本人都唔知值這麼多, 還以為自己係窮人).