股市電車男

[beaniebean]

按27/7/07頭條日報(P.14)既報導, 內容大約如下:
<<頭條網>>財經專欄作家陸羽仁既blog大受歡迎, 成為一眾小股民交流既平台。其中有一個25歲網友問咗阿媽同銀行借18萬元買咗某一隻股票, 結果蝕得好勁. 佢係網上表示如該股守唔住某個價位, 佢就會係頭條見, 暗示會做傻事. 結果, 此留言引起好多其他網友關注, 大家都好樂意勸勉及鼓勵佢, 情況就似日劇既<<電車男>>.

以下為其中網友既留言:
“在失敗中學懂, 這便是成長.”
“水能載舟, 亦能覆舟. 買賣賺蝕, 一切都係自己的造化.”

而陸羽仁既贈言係: “留得青山在, 那怕無柴燒.”

個位網位叫做 “常在股”. 我看見呢個名, 覺得好好笑, 難得佢咁有創意, 借用 <<溏心風暴>>既女主角“常在心”既名改為自己既網名.... 佢咁有心機攺呢個名, 我諗佢又點會捨得離開呢個世界呢!

不過, 人就是咁奇怪....

如果那個人是你認識的, 你反而未必會理佢, 原因係會覺得 “唔好咁八掛去理人”, “關心佢可能會好唐突”, “人哋未必喜歡你知佢咁多嘢”, “我既意見都未必幫到佢” 等等, 結果對佢既問題不聞不問.

反而在素未謀面既情況下, 網友願意豁出去表達意見及講出鼓勵既說話, 反正講錯咗嘢都無咁瘀. 雖然我無上去個blog去八掛吓, 但我諗網友既說話都係正面的, 呢件事又反映出…. 網上溫情既一面.

另該報導有一段我認為很有道理的, 現原句轉截如下:

陸Sir的投資哲學向來是分散投資,
不要將資金集中在一隻股,
亦反對借錢炒股,
他認為, 人生有很多比買股更重要的事情,
有正確的人生哲學比正確的投資哲學更重要,
年輕人不應只顧炒股而忘卻正職,
因為投資有賺有蝕, 要承擔風險,
只有專注自己的工作和事業,
才能開創廣闊的前途.
他又表示, 年輕人的收入會隨著工作經驗而增加,
不應因為蝕錢而氣餒,
但亦要自制, 不要「瞓身炒股」.

我俾“常在股”既意見係: 雖然18萬元唔係一個小數目, 但都唔駛咁氣餒. 最重要係盡快還清債務, 同睇清楚自己既人生方向. 當搵到目標就要努力實踐, 到時咪又做番一條好漢囉.

[willy]

一樣米養百樣人, 每個人買股票都有唔同的想法和期望. 但如果用18萬可以上到頭版, 咁都好cost-effective.

話又講番轉頭, 如果我係個後生仔阿媽, 一定唔會借錢比個仔買股票. 因為就算他這次賺了, 也會令他以為自己好有眼光, 下次借更多錢去投機. 這樣對他是完全沒有好處的. 我認為年青人應該認清自身能力, 有多餘錢可以去投資甚至投機也可以, 只要是用自己錢, 輸得起.