Page 1 of 1

食雲吞麵何處去

Posted: Sat Apr 04, 2009 9:35 pm
by beaniebean
星期五, 同一位屋企人去咗CWB, 由於屋企人好有興緻, 去了一間好出名既 "X奀記"去食馳名既雲吞麵.

哦... 價錢盛惠每碗28蚊, 比一般貴十幾蚊... (現時市面仍有10蚊雲吞麵)

聽聞是細細碗, 所以已有心理準備. 但當侍應把那碗麵捧過來時... 啊, 真的很細碗, 比平時酒樓的白飯碗大dd咋.

麵... 爽口呀, 湯底... 幾好喎(其他啲食評話無強烈既鹼水味), 我當然飲哂落肚.

而最正的是... 就係雲吞, 每碗有4粒, 佢哋個子細細粒, 一口已可放入口內... 雲吞用了很新鮮既大蝦而做(我估計係用半隻大蝦嚟做, 不是用碎蝦), 爽口好味, 沒有肥豬肉, 所以我也不捨得一口食落肚.

當雲吞咬開一半, 見到入面粗粗既蝦肉, 真是令人吃得開懷. 呢度既雲吞, 對我來說, 真係好好食, 可能是No.1好味道都未定.

當然也有美中不足既地方... 以咁既份量, 價錢真係偏貴. 不過間唔中食吓都OK, 對減肥既人嚟講, 嗰份量算係啱啱好.

還有另一檔要推介, 就係在中環既"沾X記", 那處的雲吞很大粒, 入面都好多蝦, 正! 盛惠16蚊, 價錢好合理. 呢間舖只賣3樣食品(雲吞, 鯪魚球, 牛腩), 啲鯪魚球係我食咁多間中, 最大粒的...

早幾日, 看到一篇專欄, 作者話係大埔一間熟食中心, 有一檔雲吞麵好正宗, 但個老闆係5月會退休... 哈, 我真係心郁郁想去試吓.

不知各位有無試過其他好好味既雲吞麵呢?

Re: 食雲吞麵何處去

Posted: Sat Apr 11, 2009 5:51 pm
by beaniebean
星期四做完運動, 我本來也不想食嘢, 事關要努力減肥去減輕或淡化我既大嬸形象. 但因朋友既盛意, 我最後還是去了佢推介既一間粥麵舖食嘢.

呢間粥麵舖(何x記)係利舞台附近, 我經常看到有些名貴房車停泊在該舖外面, 我估應有唔少有錢人得閒來幫襯. 老實說, 如是我一條友, 我不會入去食. 但今次有朋友陪, 咪入去試吓囉.

朋友說, 呢間舖是米芝蓮推介的(同x奀記一樣, 入選了米芝蓮指南). 我們揀了雲吞麵($28)及皮蛋瘦肉粥($32), 並且share嚟食.

云吞無我以上推介既"x奀記"咁好食, 其實可說沒有surprise. 但個湯底就好香同好正, 仲有蝦籽係入面, 我就飲哂落肚. 麵的份量應比"x奀記"大dd, 但都算細碗. 結論: "x奀記"的雲吞比"何x記"正, 而"何x記"的湯底就比"x奀記"好.

至於皮蛋瘦內粥, 都算好味, 但也沒有surprise.

結論, 間唔中去吓都OK, 即一年不要超過3次, 事關呢個世界仍有很多好味既食嘢等緊我同佢哋Say hello. :mrgreen: