死亡筆記2

[beaniebean]

呢套片係11月3日上畫, 我尋日係Yahoo見到已經好多人係到發表意見, 好評如潮。佢哋好多都講嗰兩個男主角好型同埋可愛, 而女主角亦好靚, 且結局仲意想不到, 但唔少人已經爆哂啲結局出嚟。呢套片近期勁賣廣告, 至於男女主角係咪咁型同可愛, 真係見仁見智, 可能要睇完套戲會有所改觀。

我本來都無諗住睇呢套戲, 但實在聽到好多人話想睇, 包括啲細路仔。佢哋話呢套片係改篇自漫畫既, 其中一個男主角 "L"啲行為好得意同搞笑。聽聞死亡筆記1宜家仲未出碟, 所以如果無睇過第1集就睇第2集, 唔知會唔會無咁好睇。

好, 睇吓遲啲有無機會去睇先。最好有人可以借啲漫畫俾我睇就好喇!!

[beaniebean]

星期日終於睇咗呢套片。我好少會咁認真去睇一套片。有幾認真? 就係我最後問人借咗套漫畫嚟煲。呢套漫畫共有12冊, 我本來諗住1個鐘頭睇1冊, 咁12個鐘頭就會搞掂。點知我高估咗自己既閱讀同理解能力, 最後淨係睇咗3冊就已經筋疲力盡。不過, 呢3冊啱啱好差不多等如"死亡筆記1"既劇情, 我總算可以明白多啲"死亡筆記2"既劇情。

呢套漫畫真係幾好睇, 除咗畫得幾靚之外, 人物各有獨特既性格。不過, 呢套漫畫唔係容易看得明白, 要用推理去思考。如果有唔明既地方, 我通常睇多2次就算數, 真係無咁多腦汁糾纏落去。

1) 夜神月 – IQ極高同埋幾靚仔(講緊漫畫既夜神月, 唔係電影嗰個), 但為咗"正義"而走火入魔
2) L - IQ極高, 造型同動作好鬼奇趣, 有啲寒背, 最喜歡除咗對鞋, 將兩隻唔著襪既腳"棟"係椅子上面
3) 流克 – 一個傻優地, 喜歡食蘋果既鬼神, 有時俾夜神月窒到佢無聲出, 見到佢既表情都幾好笑
4) 雷姆 – 另一個鬼神, 有義氣, 最後成為一個會死既鬼神 (A paradox!!!)

夜神月同L都係啲聰明到極既人, 兩個人係度大鬥法, 行錯一步就隨時玩完。兩位主角各有fans, 我自己就鐘意L喇, 因為佢既造型好鬼得意, 而且我始終覺得佢既IQ係高啲!

以日本片嚟講, 電影版既死亡筆記2都算好好睇, 劇情緊湊得嚟又加入唔少好笑位(尤其係L戴咗個好鬼搞笑既面具嗰幕), 而且結局都幾出人意表。唉, 140分鐘好快就咁過咗去。我遲啲都會睇番第一集同埋其餘9冊既漫畫。

對日本漫畫有興趣既人, 真係唔好錯過呢套片。

因識人有門路, 終於換咗個死亡筆記既膠file嚟珍藏。正...

[willy]

呢套戲口碑不差, 我會買DVD看. 國產果種.