俠影魔龍

[beaniebean]

25/12係數碼港睇完黃金甲後, 為咗慳番啲車費, 再加埋一直想睇呢套片, 結果便順便買埋26/12既飛。正如我之前所講, 我最鐘意睇早場, 盛惠$30就可以買一張Palace既飛, 真係好抵!!紅色既沙發, 寛敞既雙座位。正!!!

我既意見如下:

1. 比預期中無咁好睇, 因為廣告又話係乜乜大製作。相比之下, 黃金甲好睇很多。
2. 男主角比預期中靚仔好多, 係近期西片中難得一見既靚仔。如果10分係滿分, 我會俾8分。
3. Yahoo網友大多都話條小龍女好cutie。我都覺得係, 不過小龍女出咗好少個鏡頭就變咗大龍女。
4. Yahoo網友大多都話小龍女大得太快。小龍女係個天空飛飛吓就變咗大龍女, 唔駛食嘢就可以快高長大, 呢點真係唔合邏輯。
5. 男主角啲戲服比較有時代感 (其中有一幕見佢著條幾型既低腰褲), 呢點有啲唔配合部戲既時代。
6. 有幾幕山脈高原既景色好靚。
7. 飛龍打鬥既場面OK, 但始終唔夠真實感。
8. 呢套片會有續集。如果到時有空既話, 我應該會繼續捧場。

順帶一提, 數碼港附近有一個草地, 面對住個海, 係影相同野餐既好地方。我嗰日都影咗唔少相。不過, 記住要做好防曬準備。