踢躂小企鵝 (Happy Feet)

[beaniebean]

呢個星期二, 我係非常即興既情況下, 去咗數碼港睇呢套戲, 盛惠$40就可以買一張Palace既飛, 仲可以坐到好正中既荀位. 真係幾抵。

呢套片上畫既時候, 因為見到啲企鵝好似唔太得意, 所以無諗住去睇。但咁啱我有個好耐無返香港既屋企人返咗嚟, 且Yahoo既網友影評相當唔錯(有4.5粒星星), 所以咪帶佢去睇吓囉。

不過, 真係喜出望外, 因為呢套卡通片比預期中好睇好多, 總結如下:

1. 畫功非常細緻, 有時真假難分。
2. 雪地既景勁靚, 我宜家個腦海仲浮現幾幕令人難忘既場面。
3. 企鵝BB可愛到不得了, 隻隻都肥嘟嘟, 見到佢哋就想左擁右抱。
4. 男主角萬寶一出世就同其他企鵝唔同, 佢唔識唱歌但鐘意腳仔郁郁, 最後受到歧視, 但仍有女主角歌莉亞對佢不離不棄。正所謂 “天生我才必有用”, 佢既才華終於被人認同。
5. 有一幕大鬥法場面好精采, 話說當時一大班年青企鵝係度跳舞, 而另一班封閉保守既年長企鵝係度唱歌打對台。
6. 有一幕一班企鵝跳咗入水底游嚟游去, 場面就好似飛機表演一樣, 好有新意。
7. 萬寶被迫離開屋企後, 識咗5隻企鵝, 呢5隻配角令整套片生色不少, 其中一隻係谷德昭配音。佢哋既動作同對白非常鬼馬抵死, 總之就好好笑啦!
8. 側田同Stephy既配音就無乜特別。我仲以為側田會唱番首歌, 點知係無既。
9. 故事最後反映人類既行為影響咗生態環境, 而萬寶既踢躂舞則引起人類反省, 我認為呢點略為牽強。
10. 套片有好多首歌聽, 但唔係咁啱feel。不過, 唔少Yahoo既網友則讚啲歌好正。

總之, 呢套片有冰天雪地既靚景、可愛既企鵝BB、跳得好有節奏感既企鵝、搞笑抵死既對白, 驚險刺激既場面...等等, 係一套好值得去睇既電影。

[willy]

呢套戲真係唔錯, 佢係美國的票房是no1, 贏果套賭神007成半條街. 我必買DVD看.