緣份精華遊 (The Holiday)

[beaniebean]

之前見到廣告同Yahoo網友既影評(有4.5粒星星), 一直都好想睇, 終於尋日我去咗數碼港欣賞呢套片。

如我既期望一樣, 呢套戲真係好好睇, 睇完後感觸良多。雖然我沒有女主角既相同經歷, 但唔知點解, 有點身同感受。照我估計, 其實好多人(特別係女仕們)睇完後會有共鳴。

首先要簡介4位主角, 其中我會較為喜歡兩位女主角。

金美倫戴雅絲 (Cameron Diaz)
1. 佢係個trailer宣傳公司既老闆, 係一個事業型女子, 個性硬朗。自從年幼時候父母離異, 佢就無再流過眼淚。
2. Cameron演既戲, 我看過既只有 “情迷索瑪莉”, 佢當時真係幾靚女。係呢套片入面, 佢老咗唔少, 但我仍然覺得佢既灰藍色眼睛同金色短髮好靚, 給人甜美既感覺, 而且身型依然好fit。

琪溫絲莉 (Kate Winslet)
1. 佢係一個報館職員, 暗戀咗一個男同事3年, 係個好長情既人。
2. 我幾喜歡Kate呢個角色, 佢心地好好, 樂於助人。佢開心同唔開心既表情都好真。
3. Kate演既戲, 最出名既當然係 “鐵達尼號”。係呢套片裡面, 佢老咗唔少, 有少少肥。由於佢既角式討好, 所以佢既樣子俾人舒服既感覺, 某啲鏡頭都影得佢幾靚。

祖迪羅 (Jude Law)
1. 佢係Kate既哥哥, 職業係一個editor, 佢個老婆離開咗佢, 所以要帶住2個可愛既囡囡一齊住。
2. Jude確實係幾靚仔, 我估計佢後生個時應該仲靚仔。其中某幾個鏡頭, 佢既眼神真係幾殺食!!!

積伯克 (Jack Black)
1. 佢係Cameron前度男友既朋友, 係一個作曲家。
2. 佢雖然一啲都唔靚仔, 但為人專一, 有音樂才華。佢曾經作咗一首歌送俾Kate, 雖然很短, 但我覺得非常動聽, 怪唔之得Kate俾佢吸引住。

我既意見如下:
1. 套片一開始就有一段有關愛情既見解。我好喜歡整套片既對白, 好有意思, 有唔少地方好幽默。
2. 呢套片有唔少地方有鮮明既對比, 例如: 故事發生既地點(倫敦過既係白色聖誕, 而LA過既係唔凍既聖誕), 兩位女主角既屋企(一間係現代化既豪宅, 而另一間係溫暖雅緻既小屋)等等。
3. 有一幕講述Kate既老闆係好多人面前, 要求Kate報導佢暗戀既男同事同另一位女同事既結婚喜訊。由於事出突然, Kate當然好唔開心, 但係咁多人面前又要扮無嘢。見佢既雙眼紅哂, 想喊但又要強忍既表情, 演技真係好好!
4. 兩位女主角係失戀或高興時候既動作同表情好鬼正, crazy得嚟又好搞笑。
5. 有一幕講述Cameron好唔捨得Jude, 由於佢好多年無喊過, 但係分離既一刻, 佢終於喊咗出嚟, 連車都唔搭, 就飛奔去搵Jude, 而當時Jude亦好傷心係度流淚, 佢哋兩個真情流露。
6. 有一幕講述Kate聽電話時為Cameron同Jude傳話, hold住電話時出錯, 有啲唔應該聽既說話俾對方聽到, 呢段好鬼搞笑。
7. Kate與Jack同樣情場失意, 但會互相鼓勵對方, 佢哋既愛情比較含蓄, 但很溫馨感人。
8. Cameron同Jude呢一pair就激好多。Cameron本來認為呢段係霧水情緣, 唔會開花結果。佢既理智令佢多次想離開倫敦, 但最後又唔捨得Jude。而Jude又係個有2個囡囡既父親. 所以認為自己係 “買一送二”, 好難會有女朋友接受。但事實上, Jude既兩位囡囡好乖巧同埋好想有個好媽咪, 四人一齊既感覺都好溫馨。
9. 蜜運中既人睇完呢套片會覺得好sweet。但對果啲感情失意, 或對愛情灰心絶望既人嚟講, 其實呢套片會帶俾佢哋正面既訊息。正所謂 “有緣千里能相會”, 所以千祈唔好灰心!!! 努力加油喇!!!

我會推介呢套片俾各位, 當中特別誠意推介俾呢樹既三位網友。如果佢哋知我講緊既網友係佢同埋背後既原因, 我只能講 “你好鬼聰明, 我哋簡直係心靈相通!!!騎騎騎.......”

我實在太喜歡呢套片, 且為人口水多過茶, 所以不知不覺又講咗咁多嘢…

有一點美中不足, 就係我先約朋友食飯, 然後一齊去睇9:40 p.m.個場, 結果散場時已經係12點左右。原來數碼港既最後一班車通常係11:30 p.m.開出, 所以要搭的士返屋企。唉, 好 “溶”呀!!! 不過, 呢個係一個好教訓, 我以後都唔會咁夜去數碼港睇戲。

[willy]

Yahoo 影評4.5星, 應該是一套不差的愛情小品. 很適合愛侶一起觀看.

其實有機會和喜歡的人一起看戲, 不論怎樣的愛情電視也會覺得溫馨甜蜜. 好像有兩套港產愛情電影 "生日快樂" & "郎才女貌" 趕著於情人節前上晝, 大家不防邀請你愛的或想愛的人去看. 應該是一個不錯的選擇.