太陽之歌

[beaniebean]

呢套片係Yahoo影評有4.5粒星星, 網友大讚套片好睇, 同埋啲歌好好聽。於是, 星期日去咗睇呢套片, 意見如下:

1. 呢套愛情片真係唔錯, 雖然故事講述女主角患上不治之症, 但唔會令人太傷感, 原因係女主角一直都為佢既理想而努力, 再加理有屋企人、好朋友同男主角對佢不離不棄既支持。

2. 男女主角樣子討好, 好有青春氣息, 令人看得舒服, 感覺清新。女主角係第一次拍片, 演技幾好, 演得自然。

3. 女主角係由日本創作女歌手YUI飾演, 片中大部份啲歌係佢自己作曲同作詞, 套片啲歌真係好好聽。女主角憑歌寄意, 睇見佢唱得好投入, 單靠一個結他, 已經能打動聽眾。有興趣可去呢個官方網頁聽吓歌, 不過可惜只得一首 “Good-bye Days” (http://www.midnightsun-movie.com/)。

4. 從呢個網站先知道蒒凱琪既 “Dear Fiona”係翻唱YUI所作既歌。YUI只得19歲, 真係幾有音樂才華。

5. 片中有一幕, 個鏡頭影住啲太陽花, 當鏡頭慢慢轉移既時候, 原來呢啲太陽花鋪哂係女主角既身上, 而女主角就靜靜瞓咗係佢既coffin入面, 離開咗呢個世界。佢哋既屋企人真係有心思, 事關女主角由細到大都不可以接觸陽光, 所以會用太陽花代表陽光嚟陪住佢走。呢一幕本應是沉重的, 但眼見有咁多朶靚靚既太陽花陪住佢, 感覺真係唔同哂, 反而有一種恬靜安祥既感覺。呢個放花入coffin既idea真係好正, 如果係我既話, 我會選擇百合花, 原因係百合花外表清雅, 最重要係佢既花香, 真係"索"極都唔會厭。

6. 場內聽到其他觀眾既鼻水聲, 套片確有唔少感動位。