波叔出城：哈薩克鄉下佬去美國搵著數

[beaniebean]

呢套片於1/2 上映, 但無乜宣傳。佢既中文名已好長, 但其英文名就更加長(Borat : Cultural Learnings Of America For Make Benefit Glorious Nation of Kazakhstan)。Yahoo既網友影評反映呢套片勁爆笑。可惜, 現時只有2間戲院上映, 有點唔方便。不過, 我一定會抽空去睇吓呢套片有幾好笑。

從呢個霍士網站(http://www.foxmovies.com.hk/in_theater.aspx#Borat)既介紹, 呢套片真係好吸引, 現截錄部份內容俾大家參考吓:

- 時代雜誌十大電影
- 以「零知名巨星、冇名牌導演」效應下, 美國票房竟然爆出個大冷, 連續兩周勁奪 No. 1, 至目前為止已經收逾 1 億 2 千萬美元
- 此片憑住一副cheap cheap 戰鬥格, 奇蹟地打進美國「金球獎」, 仲榮獲「最佳影片」及「最佳男主角」(喜劇或音樂劇組別) 兩大提名
-「波叔」踏步美國即周圍搞搞震, 屎尿屁飛雞走狗乜都出齊, 不斷呼攏美國人出洋相, 並用攝影機錄低每一刻, 搞野過「笑笑小電影」
- 此片粗俗而不低俗，被譽為年度最爆笑喜劇
-「波叔」以「一臉鬍子，髮型退流行，服裝俗到痺」騎呢造型, 用最無厘頭的文化入侵, 來求教自認是全球文化中融爐的美國
- 此片鼓吹「不要扮晒高檔，輕鬆一下又何妨」的人生態度, 屢屢勸美國人不要再撐
- 此片內容大膽, 穢語不斷, 尺度寬鬆, 內附大量宗教、猶太人、女性主義等禁忌話題, 嚇得連哈薩克政府都趕緊從「世界的某個角落」跳出來自清：「波叔跟敝國毫無關係，哈薩克真的很美麗。」
-《波叔出城》活像是一部另類「公路電影」, 帶觀眾輕鬆上路，笑到捧腹

[beaniebean]

其實我一直都好想睇 “巴別塔”, 但又想睇 “波叔出城”可以笑餐飽, 最後尋日選擇咗後者, 結果有點失望。

我本來諗住波叔會好似Mr. Bean個種神神化化, 點知佢其實係非常騎呢, 行為怪旦及荒唐, 好似完全無用腦咁, 例子如下:

1. 用酒店馬桶內既水嚟洗面
2. 係美國大城市既河邊洗底褲 (佢當時已有酒店住, 唔明點解唔係酒店房內洗)
3. 見到一隻大龜, 但竟然問人呢隻動物係咪隻狗嚟
4. 隨街乜乜
5. 去完廁所後用個膠袋入住啲乜乜, 仲拎出嚟見人, 結果氣到啲人要教佢如何用廁所設備 (包括: 廁紙)
6. …

其實, 仲有好多好多... , 當中包括好多三級不文嘢。不過, 真係講唔出口... (上述既 “乜乜”都幾嘔心, 唔方便講出嚟。)

不過, 最經典既一幕, 係男主角同佢既同事係酒店房內肉摶(打架)。點解用肉摶嚟形容? 皆因佢哋係赤條條, 雖然某些鏡頭刻意打黑影, 但場面仍然異常地核突(要睇過你先會知有幾核突)。佢哋係間房打打吓, 打到出咗去走廊, 跟住再入lift(當時嚇死班女人), 之後仲入咗酒店內既一間賓宴廳, 當時有百多二百人係度, 佢哋仲要繼續打... 總之, 就失禮死人!!!

有樣嘢好佩服, 就係呢套片既美國票房。老闆應該賺到笑, 以咁低成本有咁好既票房, 呢啲爆冷情況實屬少見。

雖然, 套片想諷刺好多嘢, 但用呢種咁瘋狂既表達方式, 唔係人人受得住。我未睇過呢類片, 真係看不慣, 再加埋未想像過會有人好似波叔咁白痴!!!不過, 看過Yahoo網友既影評後, 會明白多啲套片想諷刺啲乜嘢。

戲院內不時傳出笑聲, 仲係笑得好大聲(通常係男人), 啲觀眾似乎睇得好開心喎。截至現時, Yahoo既網友影評共有12個, 佢哋一致地勁欣賞呢套片。不過, 我現時仍未能去到果種咁高境界去欣賞呢套戲。笑位係有既, 但核宊位亦有唔少。我還是最喜歡周星星既笑片, 尤其係以前果啲。

不過, 睇呢套片有樣嘢令我感到驚喜... 哈哈, 就係呢間位於金鐘既戲院(我尋日第一次去)。佢既廁所每一格都有獨立洗手盆及全身長鏡, 啱哂啲女士們; 而且, 戲院內既座位寬敞, 咁啱我坐果行同前一行相距有2-3米, 真係好有空間感, 正...正...!!! 呢間戲院既網頁homepage註明 “Experience the difference”, 果然同其他戲院有啲分別, 怪不得佢既戲飛係較貴。

繼數碼港同IFC後, 呢間係另一間好正既戲院...

[willy]

Bean, 我星期日也看了這套電影. 整體ok, 題材很另類. 此電影介紹了很多美國文化. 但事前我沒有做功課 (因為bean介紹), 不知這部電影是有點兒過份的不文.

至於那些怪旦及荒唐的行為, 我反而可以接受, 因為他只道出人類文化的差異. 例如 "用酒店馬桶內既水嚟洗面", 應不是什麼新笑話, 以前我也看過同樣的'橋'段. 記得我有一次去旅遊, 領隊講了一個他的經歷: 在西方酒店的洗手間, 在馬桶的旁邊都有一個好像馬桶, 但沒水的盆子 (其實我也不知它的用途, 可能是用來洗腳, 但我重沒有用過), 那個領隊說曾經有人把這當馬桶用.

至於人類為何會有文化的差異呢? 信上帝的又可引用 <<巴別塔>> 的故事, 簡單的一句就是神的意旨! 任何人士/機構/民族/國家妄想將自己的一套文化及價值觀加諸於別人身上, 怎樣也是途勞. 所謂逆天行事, 必遭天遣, 等著瞧吧! 其實在一個社會內, 達至小康已是非常難得. 要追求什麼大同世界, 理想國 或 烏托邦 等境界, 我想要到我們死後才有機會到達 (如果你信有天堂和地獄). 不竟那些空洞的名詞, 一般都是掛在哲學家或政治家的口邊.

寫了一大段, 大家可能都唔明白我想表達什麼. 沒問題, 當是吹水文章看完遙就算了.

[beaniebean]

從呢個上年12月既報導(http://paper.wenweipo.com/2006/12/03/BH0612030004.htm), "波叔出城"呢套片確係搞到好多人好"慶"。原來男主角都有點來頭。我有點驚訝佢原來係劍橋大學畢業。

要好似波叔著住果條螢光綠既另類泳褲, 同埋同個大肥佬拍果場經典肉摶戲, 唔係好多男演員會願意。

Willy, 你既意見確係有點高深, 可能你既思考模式比常人快好多(即係人哋要諗10個steps, 你諗1個step就搞掂)。哈, 我都係似明非明...

騎騎騎... 你果句"所謂逆天行事, 必遭天遣, 等著瞧吧!"好型喎!!!

(Bean都係唔敢亂講嘢, 如果唔係, 最高領導人贈呢句說話俾佢, 咁就慘喇~~~)