森林拯救隊 (Open Season)

[beaniebean]

星期日咗睇呢套片, 意見如下:

1. 呢套片有陳奕迅(熊寶寶)同林海峰(二打鹿)配音, 而林海峰既配音令套戲生色不少, 非常生鬼搞笑, 所以一定要睇粵語版。

2. 二打鹿其實有啲似"史力加"既驢友(由張衛健配音), 即係口水多過茶, 一講嘢就停唔得口, 唔講嘢唔舒服個隻。

3. 有幾幕既大自然景色畫得好靚。我最喜歡既係... 女主角(森林管理員)同熊寶寶係夕陽下分離果一幕既景色。

4. 呢套片好多爆笑位。其中有幕講熊寶寶要去"辦大事", 但由於佢一直係人類既屋裡面生活, 所以"辦大事"呢家嘢一定要去廁所處理, 仲一定要用廁紙。點知去到森林之後, 就無廁所去, 又無廁紙用。於是, 二打鹿就教佢搵個小樹叢搞掂, 點知有成群兔仔唔醒水, 圍住個樹叢八吓佢做啲乜東東, 結果搞到熊寶寶勁尷尬。真係好鬼好笑!!!

5. 二打鹿同熊寶寶既感情都幾似驢友同史力加既感情, 即係最初熊寶寶都幾唔老嚟二打鹿, 但經過一輪相處後, 大家都變成老死。其中有一幕我覺得幾感動, 當時熊寶寶與二打鹿同獵人搏鬥中, 突然一吓槍聲後, 二打鹿就跌咗係個地面上郁都唔郁, 熊寶寶以為佢中槍香咗, 所以佢終於發火, 將個獵人教訓咗一鑊, 然後再抱起二打鹿...... 不過, 二打鹿當然無死到, 醒番個一刻仲係講埋啲搞笑嘢。

6. 係套片裡面, 果班動物撻咗人類既物品做佢哋既武器嚟對付班獵人, 其中有一樣嘢你係估佢唔到, 呢樣嘢係...................................... bxx (女仕們專用)。

7. 有興趣既話, 可以去呢個香港官方網頁睇吓(http://www.sonypictures.com.hk/movies/openseason/)

總結, 想開開心心笑番餐, 呢套片係一個好好既選擇。

順帶一提, Sony Pictures下一套既動畫叫做"Surf's Up", 已定咗今年8月初係香港上映, 故事係同滑浪有關, 估計係視覺上應該幾有速度感。有興趣既話, 可以去呢個台灣官方網頁睇吓(http://www.sonypictures.net/movies/surfsup/)。