戇豆放大假 (Mr. Bean's Holiday)

[beaniebean]

我看了此片差唔多已有2個星期, 截至現時, Yahoo影評已有二百多個, 分數有4粒星。呢套片有唔錯既口碑, 當然唔係浪得虛名。

Mr. Bean 係搞笑方面有過人之處, 唔需多說話, 只憑著身體語言已能爆發笑料。佢份人都幾頭腦簡單, 雖然行為與別不同, 但我行我素, 唔會理別人點睇佢。另一方面, 佢對人有時好好, 肯義不容辭去幫人。雖然佢周不時搞啲鑊嘢出嚟, 但都俾佢誤打誤撞搞番掂啲蘇州屎。唔知呢啲算唔算係“大智若愚”呢?

劇情講述Mr. Bean抽到旅遊大獎(包括1部攝錄機)可以去遊法國, 當時正值康城影展。但因為一場誤會, 被人認為佢綁架一位影評人個仔。但實情佢係幫個細路仔搵番佢個老豆。Mr. Bean身處異地, 係雞同鴨講既情況下, 展開一段有趣既奇歷, 仲識咗個女演員(叫做沙冰, 可說是茄喱啡) 。雖然沙冰最後唔係Mr. Bean既女朋友, 但都可說是好好既朋友, 佢哋有個綽號叫做 “豆‧沙冰” 。哈, 我都想搵個朋友叫做 “聰明”, 咁我同佢既綽號就可以叫做 “聰明‧豆”。

呢套片有好多幕都好搞笑, 仍有印象既有:
1. 用指南針搵路
2. 逐個電話號碼尋親
3. 條tie同銀紙捲入自動小食機
4. 街頭賣唱籌路費
5. 食法國生蠔及小龍蝦大餐
6. 玩轉片場搞破壞
7. 為咗車飛去尋雞
8. 扮阿婆去掩人耳目
9. 係康城影展將一套悶片扭轉為一套好片 (呢幕好正!!!)

另一有幕亦勁好笑, 話說有部電影係康城首演, 導演係自編自導自演, 點知套片既對白來來去去都差唔多(時時圍繞“Nothing”呢個字), 開場部份仲不停replay, 影住佢既嘜頭大特寫。當時, 其他觀眾已經悶到嘔電, 個個瞓哂覺, 但個導演就好陶醉咁樣欣賞自己既演出。佢果個自戀既表情, 真係好好笑~~~~

呢套片有法國靚景伴著輕鬆音樂。法國南部既陽光海灘真係靚到暈, 海水同天空既藍色異常漂亮。看著呢套片令人鈎起多年前既回憶 ... 由於故事講述Mr. Bean手持攝錄機四圍影, 所以佢既拍攝手法都幾有旅行feel。

今次可能是Mr. Bean最後既一套電影。日後只能重溫同懷念佢既舊作, 另亦希望男主角路雲雅堅遜(Rowan Atkinson)係未來既日子裡面有更突破既演出, 繼續帶歡樂俾觀眾。

看了一些有關佢既資料, 多了點認識:
1) 身高6尺1吋 (1.85m), 怪不得佢著住條有點吊腳既西褲仍然咁有型格
2) 畢業於Newcastle University 同 Oxford University, 主修 Electrical Engineering。我諗佢個腦應該轉得好快。
3) 佢係1990結婚, 太太係一個make-up artist, 有2個細路。唔知佢既老婆同仔女有無成日俾佢搞到笑鬼死??
4) 佢好喜歡車, 買咗唔少名廠車 (佢咁有米, 一啲都唔出奇), 而且仲好喜歡賽車。哦, 佢應該係一個喜歡刺激既人。
5) 1997年第一套Mr. Bean電影, 全球票房收入超過20億港元。唔知今次闊別10年既第二套電影, 成績又會如何呢?

可參考:
http://www.takungpao.com/news/06/02/10/UL-522368.htm
http://www.imdb.com/name/nm0000100/
http://en.wikipedia.org/wiki/Rowan_Atkinson