依然范特西 (Still Fantasy)

[beaniebean]

今日, 買咗周杰倫隻新碟, 正式發行日期係9月8日, 唔知點解今日(9月6日)已有得買。宜家既我, 已好少買碟, 因為要慳$同慳地方。不過, 周杰倫係我會買碟既歌手, 屈指一數, 我已經有佢既5隻CD同1隻演歌會DVD。

當然, 買番嚟梗係第一時間先“聽”為快。呢隻碟啲歌同大碟既名一樣, 即係 “依然范特西(Still Fantasy)”。我既心水推介係:

歌曲1: 聽媽媽的話
分享其中部份歌詞:
“聽媽媽的話 別讓她受傷 想快快長大 才能保護她
美麗的白髮 幸福中發芽 天使的魔法 溫暖中慈祥”

呢首歌好輕快, 聽落好舒服, 歌詞有意思。唉... 我都快有一年無見過我阿媽同阿爸。不過, 我過多二十幾日後就會見到佢哋, 仲會一齊去玩兩個星期, 我諗我到時會好興奮, 真想kiss佢哋幾啖。

歌曲2: 千里之外
呢首歌近期好hit, 費玉清既美聲唱法與周杰倫既R&B唱腔, 配搭得天衣無縫, 令人驚喜。我同另一位屋企人都覺得費玉清把聲好溫柔同好有感情。未聽過且有興趣既人可到呢樹試聽:
http://mp3.baidu.com/m?f=ms&tn=baidump3 ... D%E2&lm=-1

總括而言, 好正 !!!

[potassium]

Beaniebean!!!!! 我哋好夾！ 我係「姐倫」fan屎嚟架！！
點解你咁快買倒佢隻碟架！你喺邊度買呀？？？
佢嘅碟我都有晒！(當然只係album啦)
你覺得今次隻碟好唔好聽呀？？

[beaniebean]

Potassium, 哈哈哈!!! 我有一種同你一見如故既感覺。Oooh, 真係好, 有人同我一樣鐘意阿Jay。

點解咁早買到? 我都唔知呀!我本來諗住去俾錢買預售版, 點知去到灣仔集成一樓就見到有得買, 另外係佢隔呢既東方188二樓都應該有得買。呢兩間舖頭啲價錢最抵。呢隻碟盛惠$90, 仲送一個用精美膠筒裝住既大海報, 上面有阿Jay四個唔同既型仔look。

好犀利!!! 你有齊阿Jay既碟, 果然係佢忠實既fan屎。你最鐘意邊隻碟? 我最鐘意就係“葉惠美”呢隻碟, 隻隻歌都好啱聽。

講番呢隻碟, 當然好好好...聽啦! 我覺得啲歌比上一隻碟 “11月的蕭邦”好聽, 部份歌曲都幾有驚喜。不如, 先試聽吓 “聽媽媽的話”啦。

http://mp3.baidu.com/m?f=ms&tn=baidump3 ... D4%92&lm=0

希望你都同我一樣喜歡呢首歌。

[potassium]

唔洗試聽喇！我今日已經喺銅鑼灣商場 (即係糖街嗰度呢) 買咗喇！！
hahahahhahahah，我買$89！平你同我d friend一蚊，yeah~ 好抵！
我唔鬼要張poster啦，舊年嗰張仲攞喺度封塵！

我冇乜印象邊隻碟好聽呀，因為隻隻都總有d好聽嘅歌，我就prefer d "lurr"同嘈歌囉，好似 "愛在西元前"、 " 對不起" 嗰d型歌咁；d lum歌都好聽，不過聽完都好感傷咁，唔敢多聽！(你知啦，姐倫咁有感情！)

我仲未煲呢隻碟呀！聽日開始我部mp3就可以有呢十首歌喇，haha！(又要聽成年…) 舊年嗰隻其實都有幾首好聽，"夜曲" 最印象深刻！

hahahhahahhaa....... beaniebean你係咪年輕人嚟架？你讀緊書定做緊嘢？

[beaniebean]

聽完你咁講, 我又知多一間舖頭可以買碟再平啲囉。好勁喎, 你可以聽呢10首歌聽成年, 真係一個念舊既人。如果姐倫知道有你咁忠實既fan屎, 應該會好高興同感動。

佢啲 “lurr”歌同”lum”歌, 我都好鐘意。正如你所講, 我記得有幾首歌(如: “安靜”), 聽完真係有啲傷感。

我係咪年輕人? 因每個人既定義都唔同, 連我自己都唔係好知。我估都唔算係囉。我大過姐倫, 但細過Kelly。我屋企有個成員細過20歲, 所以係佢身上都八到啲年輕人既玩意。咁你又係咪年輕人嚟架?

讀書定係做緊嘢? 兩樣都係, 不過, 讀書就係part time。我都打咗好多年工, 因為好鬼怕搵工, 故一直以來都無轉過工, 就嚟攞老員工金牌 (宜家金價上升, 我都想有個小小既金牌仔傍吓身, 但我公司無呢家嘢, 真係發夢都無咁早!!!)。

[Guest]

haha，我聽一隻碟成年係因為冇錢買新碟
而家好咗咯！有時d同事send d mp3嚟，都叫做識啲新歌啦~

我唔知係大過姐倫定同姐倫同年喎，佢係78定79話？我淨係記得佢1月18號生日咋~~

咁你又鐘唔鐘意張信哲？(嘩，要鼓起好大勇氣至敢問，因為做張信哲fan屎要背負「老人家」身份！)

[potassium]

弊，用咗訪客身份回覆添！willy！幫我搞掂佢啦！之前嗰段msg係我留架！

[willy]

訪客冇得解, 只可刪文. 用訪客咪重好, 人地唔知你係老人家! 又唔駛比人捉你下載翻版歌.

[beaniebean]

Potassium, 傻啦! 你同姐倫差唔多大, 即係年輕人嚟, 絶對唔係老人家!!!我認做老人家都未到你。

張信哲係非常唱得之人, 我都覺得佢好好架。但由於台灣出既碟(姐倫啲碟除外), 通常全碟既歌都唔係大部份啱聽, 所以無買佢既碟。不過, 佢嗰首歌"愛如潮水"真係連續翻聽10次都係咁好聽。所以呢, 你唔駛鼓氣勇氣問呢個問題, 其實好多女仔都好鐘恴佢。

話你知, 我係Leslie去咗另一個世界之後, 先至成為佢既fan屎。想當年, 佢離開咗既一兩日, 可能係啲電視台成日播佢啲歌, 搞到嗰幾日腦海裡裹面成日聽到"不羈的風"。我仲記得當時夜晚要返學, 但心裡面有衝動想到文X酒店走一倘去懷念佢。我係一個唔買八掛雜誌既人, 但個排都買咗幾本嚟睇, 想知道佢既往事。其中, 明X周刋既報導好感動, 我睇完都眼濕濕。之後, 我就買咗好多佢既CD同2隻演唱會DVD((89年同2000年)。不過, 最誇張...係買咗2套"儂本多情"既VCD, 原因係我買咗第一套之後, 電視台先至出另一套特別版(內附一隻VCD專輯同2張Postcard)。不過, 宜家既我要慳$同慳地方, 所以會考慮清楚才買(但姐倫啲碟唔駛考慮就會即刻買)。

請問你睇咗隻DVD未? 我今日下午睇咗喇。第一隻MV(千里之外)既結局有啲傷感, 有緣相見但卻逃避, 真係...可惜; 而第二隻MV(夜的第七章)好有電影Feel, 片頭出字既設計好特別, 留鬚既姐倫格外cool ~ ~ ~

[potassium]

willy~~~~ 我係同事之間分享mp3，冇犯法架！！

我唔睇隻DVD架，聽歌之嘛，理得佢咩樣吖 ~ 不過我會喺karaoke度睇返個mv囉，因為我係k場嘅常客！
(嗱bean妹，咁我當然都覺得姐倫勁型啦！尤其是嗰次睇演唱會，佢唱「以父之名」跳嗰隻舞，型到嘔茄！！！)

哈哈哈哈哈！不羈的風！！正~~~~ 我去k成日唱！！ 「從前如不羈的風~不愛生根~~ 我說我最害怕誓盟~~~~~~」唔好惹我添呀~~勁唱！hahahahhaha!!!! 我去k仲鐘意唱甄妮嘅「七級半地震」添呀~~~~ hahhahaha

我呀，23號買咗$400飛睇阿哲演唱會呀！！！！！！yeah!!!!!!!!!!!!!!!!!! (財散人安落~~~~)

[beaniebean]

Potassium, 我大過你架, 千祈唔好叫我bean妹, 真係會俾人笑到我面黃。 我要叫你做Pot妺先至得, 咁様親切啲。

Ooooooh, 原來你都鐘意唱K, 仲會爭咪咁勁!!! 我相信你既歌喉應該唔錯, 你班friend一定聽出耳油。Pot妹, 請問你有冇係貓頭鷹時間唱K? 有冇好介紹? (即係要平靚正, 同埋係港島區)。原因係呢個月我想同我一個屋企人係呢個時段唱K。你知唔知我上一次半夜三更去唱K係幾耐既事? 已經10年前喇, 當時因為考哂試, 同啲friend去嗌番餐。我發覺我年記大咗, 就想間唔中癲番吓。有一樣嘢估唔到, 就係你呢個年輕人, 連啲舊歌都識唱, 真係要封你做K歌之王。另外, 我發現唱K一定要點古巨基個首"勁歌金曲", 因為唱完之後就好似唱咗好多首歌, 感覺好滿足。

嘩!!!!!!!!!!!有得去張信哲演歌會, 好幸福啊!!!真係好希望你可以同張信哲握到手啊!!!

今日我行街既時候, 發現張信哲出咗新碟。你有冇買呀? 如果有既話, 請介紹吓邊隻歌好聽。

最係, 祝你23號勁開開開....心, 好好亨受呢個咁正既演唱會!!!希望張信哲encore完又encore再encore, 半夜12點之後先放歌迷離開紅館喇!

Potassium, 我越嚟越覺得你個人好鬼爽 。同你係呢個空間對話, 真係好有趣~~~~~

[potassium]

haha~~~~ 係呀~~~~~ 吹水方面我一流！但實情我個人又好內儉喎~~ 通常d網人都係「文靜」家嘛！

點為之貓頭鷹時段？我通常都係夜晚去k，最早7點，最夜唱通頂，理得佢咩時段，總之想唱就去！

我都係港島人，所以唔鐘意過海唱k！我係neway常客，green box同red box同少去。以前會去銅鑼灣Neway CEO，但都係太貴，而貴都唔係問題，早排有一次去，所有新歌都冇！連姐倫新歌都冇！幾慶呀！

銅鑼灣Sino Plaza (Elizabeth House對面) 開咗間新嘅Neway，星期六晚都有位，而且幾乾淨，我幾鐘意去。埋單百幾蚊啦~

但我知道北角間Neway好抵 (我朋友話)，weekday夜晚去的話好似$100唱成晚，包埋buffet﹙不過冇乜嘢食)~ 我嗰晚星期三收工去，6:00唱到零晨2:30，超爽！！！

[beaniebean]

好謝你報啲好料過我。文靜既Potassium, 好勁喎!! Weekday唱K都可以唱到半夜2:30, 你第二朝返工會唔會好ZZZ? 你個句"理得佢咩時段, 總之想唱就去!", 就知你係個敢作敢為既型人。

我有幾個問題想問:
1) 姐倫個首"以父以名", 你rap唔rap得掂?
2) 你最鐘意唱姐倫邊首歌?
3) 你最鐘意唱邊個歌星既歌?
4) 有無例牌K歌一定要唱?
5) 你鐘意多啲人定係少啲人一齊唱K? (你啲friend就慘, 俾你霸住個咪。)
6) 你係咪夜遊人? 有咩好蒲點介紹?我間唔中都想發神經去做夜遊人。

[potassium]

原來冇覆呢篇文章~~~

我緊係唔係型人啦，只係當日朝早off，所以當晚抖膽去唱個夜k啫~~ 至於weekend，我就係夜訓人~ 唔好蝕嘛！

回應吓你問題先：
1) 我rap唔掂呀，但舊年公司有個暑期妹，佢又係姐倫fan屎，佢哋d後生輩超勁！首首都rap到「郎郎」上口！我……多數唱「七級半地震~~~沙粒有淚印~~~火山也亂噴~~~~~~」(我好有時代感，呢期香港地震，啱晒)
2) 姐倫好多首都鐘意喎，我比較鐘意快歌，因為慢歌聽完好傷感~~~ 比較鐘意應該係「完美主義」同「愛在西元前」，姐倫嘅曲加埋阿方文山填d詞簡直係wonderful!
3) 我乜都唱個喎，男聲女聲我都唱！我d朋友同我唱k都頂我唔順，成日無啦啦低8度，合唱歌又係我獨唱晒~~~~~ 最鐘意唱「相逢何必曾相識」，仲有「慢慢地陪著你走~~~~」！﹙梁雁玲架，聽過未呀？！)
4) 例排k歌？揀「熱唱榜」嗰d啦，期期唔同喇~~~~~~
5) hahhaa...我多數2個人去k，有時2-4個，我d朋友都鐘意唱k，唱k當食飯啫~~~~~~~；你呢？
6) 我係夜鬼，但唔係蒲精；我夜晚時多數都係去k，簡唔中會去清bar，但從未去過「的士高」，又唔鐘意去蘭桂坊﹙嗰度係d「優皮士」去嘅地方！)，最鐘意就係去weweweb！

年紀大喇，唔cum老架喇，捱咁多夜，殘得好快！

[beaniebean]

Pot妹, 我都鐘意唱K, 不過, 因為無$, 所以唔可以唱K當飯食。同你一樣, 我覺得最理想既唱K人數係2-4個, 太多人係會熱鬧啲, 但到時都唔好意思同人爭咪唱。

恕我見識淺, 請問你提及既"清bar"係點樣? 乜bar都有分種類既咩?

係呀, 捱夜對皮膚唔好。你年紀尚輕, 仲有大把quota去夜瞓, 而我就快頂唔住喇! 我有時情願係到吹水多過去game room, 因為係個度要用腦汁玩遊戲, 真係少啲智力同體力都唔得。

ZZZ ....