原定約了一個家人在重慶大廈門口等, 而我與另外2個家人就早嚟咗dd. 當時, 在大廈門口外已有好多印度人係度向路人推介佢哋既餐廳, 我們稍一停下來, 咁就被三四五個人圍住係度狂sell. 佢哋不斷塞啲宣傳單張給你, 又不斷同你講應去邊層邊層樓. 就算你無反應, 佢哋都不斷同你講, 令到你行又行唔到, 當時真係有點嚇親. 從來, 其中一個話佢嗰間餐廳有某名人(早前一個人氣飲食節目的主持人, 又教煮餸又四出揾食嗰位), 於是就決定去呢間.
上到去, 餐廳內非常多人, 主要是香港的年輕人, 印度客人不多. 等咗十幾分鐘先有位. 我們叫了以下食物, 但都等咗好耐, 可能因太多客人掛.
1) 印度香料雞 ($5x) - good
2) 印度咖喱牛腩 ($5x) - good
3) 印度咖喱羊肉 ($5x) - 無食過, 唔知好唔好味, 但屋企人話好食
4) 白飯一碟 ($11) - 都幾大碟, 可供2-3人食
5) 烤餅兩份 (共$26) - OK唔錯
6) 凍檸茶一杯 ($17) - 味道同港式檸茶有點不同, 唔知是否用咗印度茶葉
我只吃了雞及牛, 味道好, 特別是啲汁, 因有好多香料. 雖然每碟份量不是很大, 但因啲汁好味, 所以最後全部既汁連同啲飯及烤餅一併掃哂入肚.
在這處吃東西有個好處, 就是不收加一服務費之餘還有九折優惠. 我諗這處都頗受歡迎, 因有很多客人(多是年輕愛吃一族), 而佢哋都點好多食物, 且見佢哋都食得開心. 我們離開時(約十點幾), 又有數個打扮新潮既人上嚟幫襯.
不過, 在重慶大廈的其他印度餐廳也有這個優惠(不收加一服務費及有九折).
有一點要提提:
1) 如果你經過重慶大廈, 而你不是上去食印度餐的話, 你千祺唔好亂接啲宣傳單張, 否則, 佢哋以為你有興趣, 咁你要好難先走得甩.
2) 如果你想去重慶大廈食印度餐但又唔知食邊間, 咁你最好上網揾吓資料才決定; 否則, 到時太多人圍住你, 你會唔識揀.
另有2個問題
: 1) 唔知係印度本土食既印度餐, 是否比香港食既印度餐更好味?
2) 由於我無去過印度, 所以唔知香港既印度餐廳會否調較食物既口味去令香港人更為接受?
今次消費: 合共約$19X (每人都唔駛50蚊... 哈哈)