鬼書友

[beaniebean]

Pot, 你之前話你淨係鐘意睇鬼片, 我就估計你揀得既鬼片, 必定有佢特別吸引之處。我啱啱去咗Yahoo搵吓呢套片既資料同影評, 發現呢套片果然係一套好既鬼片。啲影評大多反映小演員演得出色, 感情真摯, 故事笑中有淚, 且估唔到套鬼片會集合驚嚇、搞笑、親情及友情於一身。

呢套片於10月19日開始上映, 現時港島區仍有3間戲院有得睇, 希望你快啲忙完之後可以睇喇。

哈哈, 你真係識得揀好既鬼片嚟睇。如果日後有好介紹, 請報料。

[potassium]

嘿嘿~~~~~ beanbean，我終於趕完嘢，有時間覆返你啲entries喇

哈哈！對唔住！又令你失望！其實我真係一個冇乜內涵嘅人！我號稱「爛片王」！我揀嘅鬼片絕對唔會係有深度嗰啲！相反，我專揀啲爛到死嘅鬼片，例如港產嗰d「Office有鬼」、「犀照」或者日本韓國嗰啲「咒怨」、「水鬼兇靈」、「照出兇靈」同老外啲「爛鬼片」！

遲啲有套「xx寬頻 (Pulse)」，我見個poster好似幾吸引，我諗我有時間或睇完故事簡介都可能會去睇嘅。而我個fd而家就撩我睇「妄想」，但好似唔係講「鬼」，所以等我一陣上去睇睇個簡介先又。

至於「鬼書友」，我本來都想睇，因為係泰國鬼片，但係睇咗trailer，連trailer都冇恐怖位！同埋似啲親情片，我最怕！所以我都係唔睇喇！

嘿嘿，beanbean，係咪好失望我啲電影品味咁「另類」呢！

[beaniebean]

Pot, 我又點會失望呢! 你淨係對鬼片情有獨鐘, 咁就知你份人好有性格啦! 但因乜解究你淨係鐘意睇鬼片呢?

你睇鬼片既時候會唔會驚? 定係會笑?

平時我唔會揀鬼片睇, 但如果有friend叫到, 我會奉陪到底。雖然, 睇完鬼片後會好快忘記啲戲情, 但其實唔多唔少會有啲恐怖情節攝咗入潛意識裡面, 跟住失驚無神無喇喇突然浮現出嚟。所以, 我有時會驚半夜三更去廁所時係塊鏡上面見到..., 又或者深夜時份係無人既街道上有一陣...

Shuhhhhh, 呢啲嘢都係唔講咁多...

不過, 我其實唔係啲咁細膽既人嚟。